यंदाही स्टारपुत्र-कन्यांची गर्दी

खरं तर बॉलीवूडमध्ये नव्या चेहऱ्यांचं आगमन दरवर्षी होतच असतं. पण स्टारपुत्र आणि स्टारकन्यांच्या  आगमनासाठी जय्यत तयारी केली जाते.  मोठ्या धुमधडाक्यात तसंच वाजतगाजत त्यांचं स्वागत केलं जातं. त्यांच्यासाठी पायघड्या घातल्या जातात. मोठ्या बॅनरचा टेकू दिला जातो. गेल्या काही वर्षांत श्रीदेवीची मुलगी जान्हवी कपूर, कॅटरिना कैफची बहीण इजाबेलापासून ते सैफ अली खानची मुलगी सारा अली खान यांचं आगमन पडद्यावर झालं आहे. यांच्याबरोबरच काही नव्या चेहऱ्यांनीही बॉलिवूडमध्ये एन्ट्री केली आहे. उदाहरणच द्यायचं म्हटलं तर चंकी पांडेची मुलगी अनन्या पांडे,तारा सुतारिया, सिद्धार्थ चतुर्वेदी, रकुल प्रीत, सई मांजरेकर, पूजा बेदीची मुलगी आलिया फर्निचरवाला, सनी देओलचा मुलगा करन देओल यांची नावे घेता येतील. यावर्षी पुन्हा कोरोना महामारीने हातपाय पसरायला सुरुवात केला आहे. त्यामुळे एक-दोन चित्रपट सोडले तर कुणीच चित्रपट रिलीज केले नाहीत. मोठ्या चित्रपटांच्या ,बनर्सच्या चित्रपटांच्या तारखा  निश्चित करण्यात आल्या होत्या. मात्र त्यांनी आता तारखा पुढे ढकलल्या आहेत. पुढच्या काही काळात कोरोनाचे वातावरण निवळले तर चित्रपट प्रदर्शित करण्याचे मार्ग मोकळे होतील. त्यामुळे पडदयावर आपली कलाबाजी दाखवायला उत्सुक असलेल्या आणखी काही स्टारपुत्र आणि कन्यांना संधी मिळणार आहे. आमिर खानचा मुलगा जुनैद खान 'महाराजा' चित्रपटातून बॉलीवूडमध्ये एन्ट्री करणार आहे. सिद्धार्थ मल्होत्रा 'महाराजा' दिग्दर्शन करणार आहे. सलमान खानची भाची ( अतुल अग्निहोत्री व अलविराची मुलगी) एलिजा अग्निहोत्रीला सूरज बडजात्याचा मुलगा अवनिशने या चित्रपटाच्या दिग्दर्शनाची बाजू सांभाळली आहे.या चित्रपटाचा नायक आहे, सनी देओलचा धाकटा मुलगा राजवीर सिंह देओल.राजवीरचा मोठा भाऊ करन याने या आधीच बॉलिवूडमध्ये प्रवेश केला आहे. राजवीरला चित्रपटात आणण्यासाठी काही दिवसांपासून जोरदार तयारी केली होती. याखेरीज करन जौहर लवकरच संजय कपूरची मुलगी शनायाला घेऊन चित्रपट बनवत आहेत. राजकुमार संतोषी यांच्या 'बॅड बॉय' मधून मिथुन चक्रवर्तीचा मुलगा नमाशी चक्रवर्ती अभिनय करताना पाहायला मिळणार आहे. त्याची नायिका असणार आहे, एक नवोदित कलाकार आमरीन कुरेशी. हा चित्रपट डिसेंबरमध्ये रिलीज होणार आहे.

याखेरीज प्रियदर्शन दिग्दर्शित'हंगामा-2' चित्रपटातून सुरमा भूपाली म्हणजेच जगदीप यांचा नातू आणि जावेद जाफरीचा मुलगा मिजान जाफरी याचे चित्रपटसृष्टीत आगमन होत आहे. सध्या चित्रपटाचे शूटिंग सुरू आहे. सुनील शेट्टीची मुलगी आथिया हिच्या 'एन्ट्री' नंतर आता मुलगा आहान शेट्टीदेखील साजिद नाडीयादवालाच्या 'तडप' चित्रपटातून प्रेक्षकांसमोर  येत आहे. चित्रपटात त्याची नायिका आहे तारा सुतारिया हा 'आरएक्स 100' या तामिळ चित्रपटाचा रिमेक आहे. हा चित्रपट 24 सप्टेंबरला रिलीज होणार आहे. टीव्ही अभिनेत्री श्वेता तिवारी हिची मुलगी पलक तिवारी 'रोजी- द सॅफरॉन चॅप्टर' या चित्रपटात विवेक ओबेरॉयसोबत दिसणार आहे. स्टारपुत्र आणि कन्या यांच्या व्यतिरिक्त बॉलिवूडमध्ये काही नवीन चेहरेही दिसणार आहेत. यात पहिलं नावं येतं ते मिस वर्ल्ड मानुषी छिल्लरचं! ती अक्षयकुमारसोबत यावर्षीच्या दिवाळीला 'पृथ्वीराज' मधून झळकणार आहे. महाराष्ट्राचे माजी मुख्यमंत्री मनोहर जोशी यांची नात शर्वरी वाघ 'बंटी और बबली-2' मध्ये सिद्धार्थ चतुर्वेदी सोबत दिसणार आहे. हा चित्रपट 23 एप्रिलला रिलीज होणार असला तरी त्यावर कोरोनाचे संकट आहे.

यशराज फिल्म्सच्या 'जयेशभाई जोरदार' बरोबरच जुनैद खानचा 'महाराजा' मध्ये शालिनी पांडे दिसणार आहे. हिने अगोदरच तेलगू चित्रपटांमध्ये काम केले आहे. तसेच तेलगू आणि कन्नड चित्रपटांमध्ये काम केलेली रास्मिका मंदाना ही शांतनू बागची यांच्या ' मिशन मजनू' मधून बॉलीवूडमध्ये एन्ट्री करत आहे. कन्नड, तामिळ आणि तेलगू चित्रपटांमध्ये अभिनय केलेली प्रणिता सुभाष हीदेखील अजय देवगनच्या 'भूज' आणि 'हंगामा 2' मध्ये अभिनय साकारणार आहे. पंजाबचा पॉप सिंगर हांडी संधू कपिल देव यांच्या बायोपिक '83' मध्ये अभिनय करणार आहे. या चित्रपटात ट्युबर साहिल खट्टरदेखील तत्कालीन विकेट किपर सय्यद किरमाणी यांची भूमिका साकारणार आहे. 

प्रसिद्ध टीव्ही अभिनेत्री क्रिस्टल डिसुजा अमिताभ बच्चन आणि इमरान हाश्मीसोबत 'चेहरे' मधून प्रथमच मोठ्या पडद्यावर झळकणार आहे. करन जौहरच्या 'दोस्ताना 2' मधून लक्ष्य लालवानी तर 'दिया और बाती', 'न बोले तुम, न मैने कुछ कहा' या मालिकांमधून अभिनय केलेली रिमी शेख 'ट्युसडे एन्ड फ्रायडे' नावाच्या रोमॅंटिक -कॉमेडी चित्रपटातून मोठ्या पडदयावर प्रवेश करत आहे. आणखी एक टीव्ही अभिनेत्री त्रिधा चौधरी आदित्य चोप्राच्या 'शमशेरा' मध्ये रणवीर कपूर, संजय दत्त व वाणी कपूरसोबत आगमन करत आहे. हा चित्रपट 25 जूनला रिलीज होणार असून हा चित्रपट स्वातंत्र्य पूर्व पार्श्वभूमीवर आधारित आहे. -मच्छिंद्र ऐनापुरे, जत जि.सांगली

रेवती पुन्हा दिग्दर्शनात

दाक्षिणात्य चित्रपटांतून आपल्या अभिनयाचा ठसा उमटवणारी आणि राष्ट्रीय तसेच अनेक  दक्षिण फिल्मफेअर पुरस्कार पटकवणारी प्रख्यात अभिनेत्री रेवती महेश भट्ट दिग्दर्शित' अर्थ ' चित्रपटाच्या रिमेकचे दिग्दर्शन करणार असल्याची बातमी आली आहे.  कुलभूषण खरबंदा स्मिता पाटील आणि शबाना आझमी यांची भूमिका असलेल्या 'अर्थ' या सिनेमाकडे एक उत्तम कलाकृती म्हणून पाहिलं जातं. आता या चित्रपटाचा रिमेक निर्माता शरतचंद्र करणार आहेत. रेवतीने 'लव्ह' चित्रपटाद्वारे बॉलिवूडमध्ये पदार्पण केले होते. यात तिचा नायक सलमान खान होता. यातील गाणी सुपरहिट झाली होती आणि तिच्या अभिनयाचे कौतुक केले गेले होते. त्यानंतर तिने जय मेहातासोबत'मुस्कुराहट' चित्रपट केला होता. याशिवाय 'रात', 'और एक प्रेम कहानी', आणि ' असे काही निवडक 'तर्पण' असे निवडक हिंदी सिनेमे केले होते.मात्र तिने दक्षिण चित्रपटांकडे अधिक लक्ष केंद्रित केले होते. साधारण तीस वर्षांपूर्वी भारतीराजाच्या 'मन वासनाई" (1983) या तामिळ चित्रपटाद्वारे रेवतीने चित्रपटसृष्टीत पदार्पण केले. आज अखेर तिने तामिळ, मल्याळम, तेलगु, कन्नड आणि हिंदीमध्ये जवळपास सव्वाशेहून अधिक चित्रपटांमध्ये काम केले आहे. 

'कत्ताथे किलीकोडू' या तिच्या दुसऱ्याच मल्याळम चित्रपटाद्वारे तिने दाक्षिणात्य चित्रपट सृष्टीवर आणि रसिकांच्या मनावर आपली छाप उमटवली. 'काक्कोथिकाविले अप्पूपन थाडीकल' या चित्रपटातील अभिनयाने समीक्षकांनीही कौतुक केले. किलूक्कम'मधील तिच्या विनोदी भूमिकेने दर्शकांना सुखद धक्का दिला. 'देवासुरम' मध्येही तिने उत्कृष्ट अभिनयाचे दर्शन घडवले. तिने वयानुरूप शोभतील अशा भूमिकाही स्वीकारण्याचे धाडस दाखवले आहे. वय वाढत चालले असल्याचे लक्षात घेऊन तिने 'रेवणप्रभू' मध्ये मोहनलालच्या आईची भूमिका केली. दर्शकांबरोबरच शासकीय पातळीवरही तिच्या अभिनयाची दखल घेण्यात आली. 'थेवर मगन' या तामिळ चित्रपटासाठी तिला 1992 मध्ये उत्कृष्ट सहअभिनेत्रीचा राष्ट्रीय पुरस्कार मिळाला आहे. तिला 'मनवासनाई' (तामिळ), थेवर मगन' (तामिळ), 'अंजली' (तामिळ), 'अंकुरम' (तेलगू) आणि 'काक्कोथिकाविले अप्पूपन थाडीकल' (मल्याळम) या चित्रपटांसाठी उत्कृष्ट अभिनेत्री म्हणून फिल्मफेअर पुरस्कार मिळाले. त्याखेरीज फिल्म फॅन असोशियनचे आठ पुरस्कार, सिनेमा एक्सप्रेसचे चार आणि तामिळनाडू राज्य शासनाचा एक पुरस्कार मिळाला आहे. 'मित्र-माय फ्रेंड' च्या दिग्दर्शनासाठी राष्ट्रीय पुरस्कार मिळाला आहे. 'फिर मिलेंगे' हा शिल्पा शेट्टी आणि सलमान खान स्टारर एड्स रोगावर भाष्य करणारा हा चित्रपट रेवतीने खूपच सुंदररित्या प्रेक्षकांसमोर मांडला होता. तसंच तिने मुंबई कटींग आणि केरला कॅफे यासारखेही चित्रपट दिग्दर्शित केले आहेत.

सध्या ती दिग्दर्शन क्षेत्रात भरीव कामगिरी बजावत आहे. दाक्षिणात्य चित्रपटांमधून आपली कारकीर्द घडवली असली तरी इतर नायिकांमप्रमाणे भडकपणा असणाऱ्या आणि सौंदर्याच्या नावाखाली अश्लीलतेच्या मार्गाने जाणाऱ्या भूमिका तिने कधीही स्वीकारल्या नाहीत. याबाबतीत तिचे दाक्षिणात्य नायिकांतील वेगळेपण निश्चित वेगळे आहे. यामुळेच तिचे आदराने घेतले जाते. हिंदी चित्रपटांच्या निर्माता-दिग्दर्शकांनी या अभिनेत्रीला गांभियाने घेतले नाही, हे त्यांचे दुर्दैव म्हणावे लागेल. रोमॅंटिक भूमिका तिने केल्या नाहीत असे नाही पण वास्तवतेच्या जवळ जाणाऱ्या भूमिकांनाच तिने प्राधान्य दिले. -मच्छिंद्र ऐनापुरे

दक्षिण चित्रपट बॉलिवूडला भारी

वीसपेक्षा अधिक भाषा आणि बोलींमध्ये चित्रपट बनवणाऱ्या भारतात बॉलिवूडला एक वेगळं स्थान आहे. प्रादेशिक भाषांमध्ये मोठ्या बजेटचे भव्य चित्रपट, अखिल भारतीय स्तरावरचे लोकप्रिय कलाकार , सर्वाधिक सिनेमागृहांमध्ये रिलीज होणारे चित्रपट आणि बॉक्स ऑफिसवर वाढत चाललेला गल्ला यामुळे भारतीय चित्रपटांचा व्यापार अलीकडच्या काळात तेजीत आहे. गेल्या वर्षी लॉकडाऊनने जसा सर्वच गोष्टींना फटका बसला तसा चित्रपटसृष्टीलाही बसला,पण अलीकडच्या काळात भारतीय सिनेमा उद्योगाची भरभराट चालू आहे.तसे आर्थिक गणितही बदलत चालले आहे. मात्र यात एक महत्त्वाची बाब म्हणजे प्रादेशिक भाषांमधील चित्रपट बॉलिवूडला भव्यता, आधुनिक तंत्रज्ञान, मारधाड आणि वेगाच्या  बाबतीत मागे टाकले आहेच, पण बजेट आणि बॉक्स ऑफिस कलेक्शन यातही दक्षिण भारतीय चित्रपट बॉलिवूडला ' दे धक्का' देताना दिसत आहे.

बॉलिवूडला सध्या दोन गोष्टींची नितांत गरज आहे, कारण प्रादेशिक चित्रपट त्याच्या बरोबरीला येऊन ठेपला आहे. सध्याच्या परिस्थितीत तर बॉलिवूडला एका तरी हिट चित्रपटाची आवश्यकता आहे आणि तोही आठवड्याभरात 100 - 200 कोटींचा गल्ला करणारा असावा. चित्रपटगृहांमध्ये ऑक्टोबरपासून जो अंध:कार पसरला आहे, तो नाहीसा व्हायला हवा आहे. सध्या सगळ्यांच्या नजरा 'ईद'ला रिलीज होणाऱ्या सलमान भाईच्या 'राधे' चित्रपटाकडे लागले आहे. एक असं स्वप्न रंगवायला हरकत नाही- चित्रपट मालकांनी याचा आनंद सेलिब्रेट करण्यासाठी मिठाईवाल्यांकडे लाडवांची ऑर्डर देऊन टाकली आहे. दोन-चार दिवसांत 'राधे'ने शंभर कोटींचा पल्ला गाठला आहे.झेंडावाच्या फुलांनी सजवलेल्या चित्रपटगृहांमध्ये हर्ष-उत्साहाने लाडू वाटले जात आहेत. आणि याच आनंदात घोषणा दिल्या जात आहेत-'चला, बॉलिवूडला चांगले दिवस आले.'
बॉलिवूडला दुसरी महत्त्वाची गरज आहे ती गडगंज संपत्ती असलेल्या उद्योजकाची! जो सिनेमा निर्मितीवर मुक्तहस्ते पैसे उधळायला तयार आहे. म्हणजे जो सहजपणे कुठल्याही एका चित्रपटावर 500-1000 कोटी रुपये लावू शकेल. पण त्याला 'हार्ट अटॅक' आला नाही पाहिजे. बॉलिवूडला आता अशा तगड्या निर्मात्याची गरज आहे. कारण दक्षिण चित्रपट निर्माते 500-500 कोटी रुपये चित्रपटासाठी लावत आहेत.
इकडे बॉलिवूडचे निर्माते 200-300 कोटींपेक्षा पुढे जायला तयार नाहीत. अखिल भारतीय फिल्म विश्वात बॉलिवूड'फ्लॉगशिप इंडस्ट्री' आहे. बॉलिवूड म्हणजे भारतीय चित्रपटसृष्टीचे नाक आहे. सध्या सर्दीमुळे चोंदले आहे. हे नाक आतापर्यंत तरी आमिरखानने सांभाळले आहे. त्यामुळे देशातील सर्वाधिक कमाई करणारा 'दंगल' (2016) हा चित्रपट ओळखला जातो.त्याने 2000 कोटींपेक्षा अधिक व्यवसाय केला आहे, पण 1800 कोटींपेक्षा अधिक कमाई करणारा 'बाहुबली' हा चित्रपट ' दंगल' पेक्षा फक्त 'बोटभर' मागे आहे. अशा कठीण परिस्थितीत बॉलिवूडला फक्त आमिर खानवर विसंबून चालत नाही.
दक्षिणेतील प्रादेशिक चित्रपटांसाठी कॉरपोरेट कंपन्यांनी आपल्या थैल्या अक्षरशः उघड्या ठेवल्या आहेत. लोकप्रिय कलाकारांना घेऊन  चित्रपट बनवणाऱ्या दक्षिण भारतीय चित्रपटाने आपले बजेट 500 कोटींच्या वर नेऊन ठेवले आहे. अजूनपर्यंत बॉलिवूड इंडस्ट्रीमध्ये 500 कोटींचा एकही चित्रपट तयार झाला नाही. तामिळ फिल्म इंडस्ट्रीमध्ये 2018 साली रजनीकांत यांचा 570 कोटी बजेटचा '2.0' चित्रपट रिलीज झाला होता. ब्रिटिश-श्रीलंकाई वंशाचे उद्योजक  सुबाकरन यांच्या लायका प्रॉडक्शन कंपनीने यासाठी पैसा लावला होता. हीच लायका कंपनी  आता मानिरत्नमद्वाराचा 400-500 कोटी बजेटचा 'पोन्नीइन सेल्वम' बनवत आहे. 'बाहुबली' चे तेलगू चित्रपट दिग्दर्शक एसएस राजमौली सध्या  400 कोटी बजेटचा 'आरआरआर' नावाचा चित्रपट साकारत आहेत. दुसरीकडे अजूनही बॉलिवूडमध्ये चित्रपटांचे बजेट 200-300 कोटींच्या आसपास घुटमळत आहे. दक्षिण चित्रपटांनी बॉलिवूडला बॉक्स ऑफिसवर आव्हान दिले आहे. 13 जानेवारीला रिलीज झालेल्या 'मास्टर' तामिळ या चित्रपटाने आतापर्यंत 260 कोटींपेक्षा अधिक कमाई केली आहे. तर इकडे बॉलिवूडमध्ये ऑक्टोबरपासून आतापर्यंत एकाही चित्रपटाने 'शंभर क्लब' मध्ये प्रवेश केला नाही. हे बॉलिवूडसाठी चांगले संकेत नाहीत,एवढेच म्हणावे लागेल.-मच्छिंद्र ऐनापुरे, जत जि. सांगली  9423368970

‘आलमआरा’ हा पहिला भारतीय बोलपट झाला नव्वद वर्षांचा

लहान बाळ पहिल्यांदा बोलू लागते तेव्हा घरातल्या सर्वांनाच त्याचे कौतुक वाटते. ‘आलम आरा’ या चित्रपटासोबतही असेच काहीसे घडले. १४ मार्च १९३१ रोजी प्रदर्शित झालेला हा पहिला भारतीय संगीतप्रधान बोलपट आहे. बोलणारा सिनेमा पाहण्यासाठी त्यावेळी सिनेमागृहाबाहेर रसिकांची इतकी गर्दी जमली होती की, तिला पांगवण्यासाठी पोलिसांना लाठीमार करावा लागला. आज या बोलपटाने नव्वदीत पदार्पण केले आहे. मुंबईतल्या मॅजेस्टिक थिएटरमध्ये ‘आलम आरा’ प्रदर्शित करण्यात आला. या चित्रपटाने त्याकाळी लोकप्रियतेचे शिखर गाठले. सलग चार आठवडे सिनेमागृहाबाहेर ‘हाऊसफुल्ल’ची पाटी होती. तिकिटांच्या काळ्याबाजाराची सुरुवातही याच चित्रपटापासून झाली. चार आण्याचे तिकीट त्याकाळी ब्लॅकमध्ये तब्बल पाच रुपयांना विकले गेले. त्यामुळे थिएटरच्या बाहेरून तिकीट घेऊन येणाऱ्यांना प्रवेश दिला जाणार नाही, अशी सूचना चित्रपटाच्या फलकावर लिहावी लागल्याचे सिनेअभ्यासक सांगतात.

इम्पिरीअल मुव्हीटोन (मुंबई) यांनी या १२४ मिनिटांच्या बोलपटाची निर्मिती केली होती. मास्टर विठ्ठल, जुबेदा, पृथ्वीराज कपूर, सुशीला, जिल्लो एलिझर, जगदीश अशा त्याकाळी नावाजलेल्या सिनेकलाकारांनी या चित्रपटात भूमिका साकारल्या होत्या. जोसेफ डेविड पेणकर यांनी लेखन केले होते. एका राजकुमाराचे आदिवासी युवतीवर जडलेले प्रेम हा कथेचा विषय होता. चित्रपटाचे दिग्दर्शन आर्देशीर इराणी यांनी केले होते.

भारतीय चित्रपटसृष्टीतले पहिले गाणे

‘आलम आरा’ चित्रपटात ‘दे दे खुदा के नाम पर...’, ‘बदला दिलवाएगा...’, ‘रूठा है आसमान...’, ‘तेरी कातिल निगाहों ने मारा...’, ‘दे दिल को आराम...’, ‘भर भर के जाम पिला जा...’ आणि ‘दरस बिना मारे है...’ अशी सात गाणी आहेत. फिरोजशाह मिस्त्री यांनी ती संगीतबद्ध केली होती. त्यातील ‘दे दे खुदा के नाम पर...’ हे भारतीय चित्रपटसृष्टीतील पहिले गाणे मानले जाते. वजीर मोहम्मद खान यांनी ते गायले होते. हार्मेनियम, तबला आणि व्हायोलिन या वाद्यांसह हे गाणे लाइव्ह रेकॉर्ड करण्यात आले.

चित्रपटसृष्टीत घडवली क्रांती

त्याकाळी पुनर्मुद्रणाची (डबिंग) सुविधा नव्हती. संवाद आणि गाणी एकाच फितीमध्ये संग्रहित होत. त्यामुळे संपादनात बऱ्याच अडचणी येत असल्याने आजूबाजूला कोणताही आवाज होणार नाही याची काळजी घ्यावी लागत असे. ‘आलम आरा’चे चित्रीकरण ग्रॅण्ट रोड स्थानकालगतच्या ज्योती स्टुडिओमध्ये झाले. रेल्वे गाड्यांचे आवाज पूर्णतः थांबल्यानंतर रात्री १ ते सकाळी ४ यादरम्यान चित्रीकरण करण्यात येत असे. तोकड्या तंत्रज्ञानापुढे शरणागती न पत्करता दिग्दर्शक आर्देशीर इराणी यांनी आपले ध्येय पूर्ण करून भारतीय चित्रपटसृष्टीत क्रांती घडवली.

ओटीटीचे नियम व फायदे

ओटीटीच्या आगमनानंतर चित्रपटगृहे बंद होण्याची भविष्यवाणी काही फिल्मी पंडितांनी केली होती, आता सरकारची मार्गदर्शक तत्त्वे आल्यानंतर ही मंडळी आपलं तोंड लपवून बसली आहेत.  दुसरीकडे, सरकारच्या मार्गदर्शक सूचनांचे उल्लंघन होऊ नये आणि कोर्ट-कचेरयांच्या चकरा मारायला लावू नयेत म्हणून  वेब सीरिजचे निर्माते दृश्यांना कात्री लावण्यात गुंतले आहेत.  नवीन नियम बनले असले तरी नवीन घोषणाही केल्या जात आहेत. अशातच  निर्माता फरहान अख्तरचा लेटेस्ट चित्रपट 'तुफान' 21 मे रोजी अमेझॉन प्राइमवर रिलीज होणार आहे.

पैसे इकडचे तिकडे करणारे बहुतांश मोबाइलधारक ओटीपी (वन टाईम पासवर्ड) शी परिचित आहेत.  इकडे ओटीटी (ओवर द टॉप) देखील त्यांच्या जीवनाचा एक भाग बनत चालला आहे.  कोरोना काळात तिची ओळख तीव्र झाली जेव्हा त्याने नाभिदर्शना स्त्रियांबरोबरच 50 इंचाच्या टीव्हीवर बर्‍याच शिव्या आणि गोळ्या चालवताना पाहिले.  इथे प्रत्येक दुसरे पात्र हातात बंदुका घेऊन आई आणि बहिणींचा उद्धार करत होता. जेव्हा सर्व काही ठप्प झाले तेव्हा सिनेमा अशाप्रकारे घरात घुसला.

एक वेळचे पैसे देऊन तिकीट न घेता त्याचा आनंद घेत असलेला वर्ग त्यावर तुटून पडला होता. रसहीन जीवन ओटीटीमुळे रसाळ बनले.  पण नैतिकता वाल्यांच्याच्या भुवया देखील वाढू लागल्या होत्या.  इतक्या शिव्या, इतक्या गोळ्या.  संस्कृती नरकात जात आहे.  ओटीटीला कायदेशीर कार्यक्षेत्रात आणा, आणि असल्या मालिकांवर बंदी घाला.  असले प्रकार थांबवा म्हणून चांगलीच ओरड झाली आणि मग  एक दिवस सरकार जागे झाले आणि ओटीटीवर निर्बंध लावले. 

सरकार म्हणाले, वयोमानानुसार आता लोक ओटीटीचे कार्यक्रम पाहतील.  सात, 13, 16 आणि 18 वर्षाच्या मुलांसाठी वेगवेगळे कार्यक्रम तयार केले जातील.  जसे मांजरीपासून दूध लपवून ठेवले जाते तसेच काहीवेळा मांजरीला देखील खाद्य दिले जाते त्याच प्रकारे टीव्हीचे मुलांपासून संरक्षण केले पाहिजे. टीव्हीला कुलूप लावा.  किल्ली आपल्याकडे ठेवा.  जर चाव्या मुलांच्या हातात असतील तर ते बिघडून जातील. मोठी आणि प्रौढ माणसे बिघडली तर बिघडू देत,पण  मुले बिघडू नयेत.

ओटीटी आल्यावर ज्या निर्मात्यांना चित्रपट, नाट्यगृह मिळाले नाहीत आणि प्रेक्षक भेटले नाहीत ते आनंदाने उसळी मारू लागले. काही चित्रपट पंडितांनी असे म्हणायला सुरूवात केली की आता सिनेमागृहांची आवश्यकता नाही.  आता आम्ही ओटीटीसाठी चित्रपट बनवू.  सिनेमागृह मालक घाबरले.  म्हणाले की ओटीटी चालू राहिल्यास थिएटर बंद पडतील.

दुसरीकडे कलाकारांचा विचारही बदलू लागला.  मल्याळम चित्रपट निर्माते मोहनलाल यांनी सिनेमागृहांऐवजी आपला मल्याळम चित्रपट ‘दृश्यम 2’ ओटीटीवर रिलीज केला, तेव्हा त्यांच्यावर लोक उसळून उठले. ते म्हणाले की, ज्या सिनेमागृहांनी त्यांना सुपरस्टार बनविले ते त्याच सिनेमागृहांसाठी खड्डे खोदत आहेत.  काही दिवस मोहनलाल शांतपणे ऐकत राहिले. मग त्यांनी उत्तर दिले की आम्ही तर अभिनेते आहोत. ओटीटीचे जाळे संपुर्ण जगभर पसरले आहे.  ओटीटी संपूर्ण जगात दृश्यमान आहे.  आम्ही कलाकारांसाठी चांगले काम करत आहोत, तुम्ही तुमचं तुम्ही बघा. अमिताभ बच्चनपर्यंत अक्षय कुमारपर्यंत ओटीटीवर आले.  आता उरला कोण?

परंतु सरकारने मार्गदर्शक तत्त्वांचा निर्णय घेताच ओटीटी कंपन्यांची हवाच निघाली.त्यांच्या सीईओंचा रक्तदाबच वाढला. तयार केलेल्या वेब सिरीजचे काय होईल आणि जे बनवले जात आहे, त्याचे काय करणार, असा त्यांना प्रश्न पडला. त्यापैकी बहुतेकांवर वादविवाद झडू लागले. पहिल्यांदा तर त्यांचा वाद विवाद घडवायचा आणि नफा कमवायचा असा हेतू होता.

आता कोर्ट-कचेऱ्याच्या पायऱ्या चढाव्या लागू नयेत म्हणून कंपन्या सावध पावले टाकत आहेत.  हिंसा, अश्लील आणि द्वेषयुक्त भाषणाच्या आधारावर ओटीटीचा व्यवसाय चालू होता, पण आता त्याशिवाय कसे चालेल.  सरकारच्या मार्गदर्शक सूचनांचे अनुसरण करून, मोकाट वळूसारख्या ओटीटीला खुंट्याला बांधण्यात आले आहे आणि वेब सीरिजचे निर्माते आपले स्वत:च्या  चित्रीकरण केलेल्या दृश्यांना कात्री लावताना दिसत आहेत.-मच्छिंद्र ऐनापुरे, जत जि. सांगली

दक्षिणेच्या रिमेक चित्रपटांचा बॉलिवूडला आधार

तामिळ चित्रपट 'मास्टर' यावर्षी 13 जानेवारी रोजी प्रदर्शित झाला होता आणि आतापर्यंत त्याने 250 कोटींचा व्यवसाय केला आहे.  रिलीज होताच करण जोहरसह बॉलिवूड निर्माते त्याचा हिंदीमध्ये रीमेक करण्यासाठी त्याच्या हक्कासाठी धावले. असे दक्षिणेमधील प्रत्येक चित्रपटाच्या बाबतीत घडत आहे.  सध्या बॉलिवूड त्यांच्या रीमेकवरच चालला आहे.  2021 मध्ये 'तडप' आणि 'जर्सी' सारखे अनेक चित्रपट पाहायला मिळतील, जे दक्षिणच्या हिट चित्रपटांचे रिमेक आहेत. तमिळचा हिट चित्रपट' कॅथी' अजय देवगणला फार आवडला आहे. त्याने तो हिंदीतील त्याच्या रीमेकचा हक्क विकत घेतला आहे.  जॉन अब्राहम मल्याळम चित्रपट 'अयप्पन काशीयम'  लट्टू झाला आहे, त्याने त्याचे हिंदी हक्कही विकत घेतले असून त्याचा रिमेक बनवत आहे.  'भागमती' तमिळ आणि तेलगूमध्ये हिट झाल्यावर लगेच बॉलिवूड निर्मात्यांनी 'दुर्गावती' नावाने त्याचा रीमेक बनविला.

बॉलिवूडची नजर दक्षिणवरसध्या बॉलिवूडचे बहुतेक निर्माते दक्षिणेच्या हिट चित्रपटांवर नजर ठेवून आहेत.   चित्रपट हिट होताच ते त्याचे हिंदी रिमेक हक्क विकत घेण्यासाठी पोहोचतात.   'मास्टर' हिट ठरल्याबरोबर लगेच बॉलिवूडच्या निर्मात्यांची त्याचे हक्क खरेदी करण्यासाठी स्पर्धाच  सुरू झाली.  निर्माता करण जोहरला हिंदीमध्ये 'मास्टर' बनवण्याचे हक्क विकत घ्यायचे होते, परंतु मुराद खेतानी यांनी ते आठ कोटींमध्ये विकत घेतले. खेतानी यांनी यापूर्वी सोनी टीव्हीबरोबर 'मुबारका', टी सिरीजसोबत 'कबीर सिंह' चित्रपट बनवला आहे आणि टी सिरीजबरोबर 'भूलभुलैया 2' बनवत आहेत. 2017 मध्ये रिलीज झालेल्या 'विक्रम वेध' या तमिळ चित्रपटाच्या रीमेकमध्ये सैफ अली आणि आमिर खान सोबत काम करण्याच्या बातम्याही येत आहेत.  बोनी कपूर यांनी '‘एफ2 फन एंड फस्ट्रेशन’ या तेलगू चित्रपटाचे हक्क विकत घेतले आहेत.  2020 मध्ये रिलीज झालेला मल्याळम चित्रपट 'अयप्पनम कोश्याम'चे  अधिकार जॉन अब्राहमकडे आहेत. साजिद नाडियादवाला 'आरएक्स 100' या तेलगू चित्रपटाचा रीमेक 'तडप' नावाने आणणार आहे,  तो सप्टेंबरमध्ये प्रदर्शित होईल. या चित्रपटातून सुनील शेट्टीचा मुलगा आयान प्रथमच बॉलीवूडमध्ये प्रवेश करणार आहे. तमिळ थ्रिलर 'कॅथी' वर अजय देवगणला हिंदी चित्रपट बनवायचा आहे आणि रीमेक हक्कही खरेदी केले गेले आहेत.  शाहिद कपूरसमवेत करण जोहरने हिंदीमध्ये 'डियर कॉम्रेड' तेलगू चित्रपट बनवण्याचे हक्क विकत घेतले आहेत.  एकंदरीत बॉलिवूडचा प्रत्येक हिट निर्माता दक्षिण भारतातील हिट चित्रपटांकडे डोळे ठेवून आहे. बॉलिवूड दक्षिण भारतातील हिट चित्रपटाच्या रीमेकचे अनुकरण करत आहे.

यावर्षीही रीमेकचा पाऊस 2021 मध्ये साऊथच्या हिट चित्रपटांचा रिमेक मोठ्या प्रमाणात  हिंदी चित्रपट प्रेक्षकांना पाहायला मिळणार आहे. अक्षय कुमारचा 'लक्ष्मी बॉम्ब' रिलीज झाला आहे. शहीद कपूरला घेऊन बनवला जात असलेला 'जर्सी'  नावाचा चित्रपट 2019 मध्ये रिलीज झालेला याच नावाच्या  तेलुगू चित्रपटाचा रिमेक होता.

यावर्षी 5 नोव्हेंबरला 'जर्सी' दीपावलीला रिलीज होईल.  अक्षय कुमारचा 'बच्चन पांडे' हा चित्रपट अजित अभिनित तमिळ चित्रपट 'वीरम'चा रिमेक असल्याचे म्हटले जात आहे.  तसेच गेल्या वर्षी रिलीज झालेल्या 'अंजाम पॅथीरा’ या मल्याळम चित्रपटाच्या रिमेकमध्ये सलमान खान काम करणार असल्याच्या बातम्या आहेत.  तेलुगू चित्रपट 'वैकुंठापुरमुल्लो' ​​च्या रीमेकमध्ये कार्तिक आर्यन मुख्य भूमिका साकारणार आहे.  इशान खट्टर आणि अनन्या पांडे 'टॅक्सीवाला'च्या रिमेकमध्ये दिसणार आहेत.  सनी देओलचा मुलगा करण देओलदेखील साऊथच्या हिट चित्रपटाच्या रीमेकवर काम करत आहे.  सलमान खानचा चित्रपट 'कभी ईद कभी दीवाली' हादेखील तेलुगू चित्रपटाचा रिमेक असून यात चार भावांची कथा आहे.  या चित्रपटाची नायिका पूजा हेगडे आहे.

रीमेक म्हणजे हिट

1989 च्या 'रामोजीराव स्पीकिंग' या मल्याळम चित्रपटावर तयार झालेल्या 'हेराफेरी'ने अक्षय कुमारची कारकीर्द उज्ज्वल केली.  अजय देवगणच्या तमिळ चित्रपटाच्या 'सिंघम' हिंदी रिमेकनेही हीच गोष्ट केली होती.  'वॉन्टेड' आणि 'बॉडीगार्ड' या चित्रपटाच्या यशाने सलमान खानला मोठे बळ मिळाले.  तेलगू चित्रपट 'टेम्पर' वर आधारित रणवीर सिंगच्या 'सिम्बा' ने बॉक्स ऑफिसवर चारशे कोटींपेक्षा अधिकचा व्यवसाय केला.  60 कोटींमध्ये बनलेल्या आमिर खानच्या 'गजनी' ने 250 कोटींपेक्षा जास्त कमाई केली.  बहुतेक रीमेक हिंदी चित्रपट हिट झाले आहेत. हिंदी चित्रपट निर्माते आणि अभिनेते हे दोघेही दक्षिणेच्या हिट चित्रपटांवर बनलेल्या रिमेकला अधिक प्राधान्य देताना दिसत  आहेत. कारण तेथे धोका कमी आहे.  यामुळेच बॉलिवूडमधील रिमेक चित्रपटांचा बॉलिवूडमध्ये दबदबा वाढत आहे.-मच्छिंद्र ऐनापुरे, जत जि. सांगली

लखलख चंदेरी तेजाची, न्यारी दुनिया...

दिवाळीच्या रात्री लखलख जातात. पण याच रात्री किंवा  अन्य वर्षभर या न त्या कार्यक्रमात एक गाणं लखलखत असतं. ते म्हणजे 'लखलख चंदेरी तेजाची, न्यारी दुनिया...'! संगीत कलानिधी मा. कृष्णराव यांची ही काळाच्या पुढे जाऊन केलेली अद्वितीय अनन्य स्वरचना. आज सुमारे 80 वर्षानंतरही हे गाणं लखलखत आहे. मा. कृष्णराव पुढील काळात येणारे संगीत आधीच पाहत असत. ते द्रष्टेपण त्यांच्यात होते. हे गीत, चित्रपट क्षेत्रातील आकाशात एक झळाळणारे  नक्षत्र झाले आहे. अनेक माध्यमातून झळकण्याचे भाग्य या गीताला लाभले. त्यामुळे ते 'ब्रॅण्ड सॉंग' झाले आहे. शांताराम आठवले यांनी मा.कृष्णराव स्वररचनेवर शब्द रचलेत. आजही या 'ब्रॅण्ड सॉंग' चा संचार सर्वत्र सुरू आहे. दूरदर्शन वाहिन्यांची शीर्षक गीते, मराठी चित्रपट समारंभ, त्यातील सामुहिक गायन, रंगमंचावरील गायन याला  प्रेक्षकांची भरपूर दाद मिळते. संगीतकार अजय-अतुल यांनी तर या नावाने लाइव्ह कार्यक्रम केले. या गीताची निर्मिती व ध्वनीमुद्रण 1940 सालचे व हे गीत असलेला चित्रपट 'शेजारी' प्रकाशित झाला 1941 साली! (हिंदीमध्ये चित्रपट 'पडोसी' व गीत 'कैसा छाया है' कवी मुन्शी अजीज) मराठी व हिंदी चित्रपटांचे संगीत दिग्दर्शन मा. कृष्णराव यांचेच होते. मराठी गीतात श्रीमती जयश्री व वसंत देसाई प्रमुख गायक तर हिंदीमध्ये श्रीमती अनिस खातून व बालबीर, खान मस्ताना हे प्रमुख गायक होते. या गीतात वाद्यमेळ्यांच्या लयीत 'क्लॅप्स' चा (टाळ्यांचा) वापर प्रथम मा. कृणाराव यांनी केला नंतर पुढे मी केला , असे संगीतकार ओ.पी. नय्यर यांनी एके ठिकाणी केला आहे. या गीतातील कोरसचे वैशिष्ट्य हे की, स्त्रियांच्या 'गळी आवाजात' अतितार सप्तकात गायलाय. पुढील काळात स्त्री पार्श्वगायनात असा 'गळी आवाज' प्रचलित झाला. या स्त्री आवाजात जयश्रीबाईंचा आवाज सहज ओळखू येतो. या सुमारास त्या माँ.कृष्णराव यांच्याकडे दीड वर्ष गायन शिकत होत्या. या गीतात जास्तीत जास्त वाद्ये विशेषतः  ताल वाद्ये वापरली आहेत. मा. कृष्णराव यांनी त्यांच्या कारकिर्दीत वाद्यांचा मोठा संचय प्रभात कंपनीत करून ठेवला. -मच्छिंद्र ऐनापुरे, जत जि. सांगली

कोरोनाच्या वाढत्या संसर्गाने बॉलिवूड चिंतेत

फेब्रुवारीच्या शेवटच्या आठवड्यापासून मुंबई,पुण्यासह महाराष्ट्रात कोरोनाने पुन्हा हात-पाय पसरायला सुरुवात केल्याने बॉलिवूड काळजीत पडला आहे. ज्या निर्मात्यांनी आपल्या चित्रपटांच्या प्रदर्शनाच्या तारखा जाहीर केल्या होत्या, त्यांच्या पुढेही काय करायचं असा प्रश्न निर्माण झाला आहे. सिनेमागृहे पुन्हा बंद होतील का,हा प्रश्नही आहे. अक्षयकुमारचा 'सूर्यवंशी' चित्रपटाची रिलीज तारीख 2 एप्रिल जवळपास निश्चित झाली होती,पण आता त्याला अनिश्चितीचे ग्रहण लागले आहे. अशीच अवस्था 1983 च्या क्रिकेट वर्ल्ड कप आणि कपिल देववर बनत असलेल्या '83' चित्रपटाची झाली आहे. कोरोनाच्या वाढत्या प्रकरणामुळे निर्माते काळजीत असले तरी नाउमेद झाले नाहीत.

सरकारी घोषणेनंतर चित्रपटगृहे शंभर टक्के उघडण्यात आली होती, मात्र ही चित्रपटगृहे मोठ्या चित्रपटाची अजूनही प्रतीक्षा करत आहेत. 19 मार्च ला यशराज फिल्म्सने अर्जुन कपूर आणि परिणिती चोप्रा यांच्या प्रमुख भूमिका असलेल्या 'संदीप आणि पिंकी फरार ' तसेच टी सिरीजने जॉन अब्राहमचा 'मुंबई सागा' प्रदर्शित करण्याची घोषणा केली आहे.

या घोषणेमुळे वाटत होतं की बॉलीवूड रुळावर येत आहे. यशराज फिल्म्सने आपल्या पाच चित्रपटांची घोषणा करून जी सुरुवात केली होती,त्यामुळे निर्मात्यांचा आत्मविश्वास बळावला होता. परंतु वाढत्या कोरोना प्रकरणानंतर प्रदर्शन क्षेत्रात चिंतेची सावली आणखी गडद होताना दिसत आहे. महाराष्ट्रात सतत रोज आठ- नऊ हजाराचे रुग्ण पाहायला मिळत असल्याने निर्माते पुन्हा 'थांबा आणि वाट पहा' या परिस्थितीत असल्याचे दिसते. यात आणखी एक भर म्हणजे महाराष्ट्राचे मुख्यमंत्री उद्धव ठाकरे यांनी आवश्यकता भासल्यास पुन्हा लॉकडाऊन करण्याचा इशारा दिला आहे. अशा परिस्थितीत निर्मात्यांना वाटतं की, खरेच चित्रपटगृहे पूर्ण क्षमतेने उघडी राहतील का ?आणि प्रेक्षक पूर्ण क्षमतेने चित्रपट गृहांकडे परततील का?

प्रदर्शनासाठी तयार चित्रपट

कोरोनाची महामारी मार्च 2020 पासून सुरू झाली, ते  नोव्हेंबर 2020 पर्यंत चित्रपटगृहांना टाळे लागले. या काळात कोणताच चित्रपट रिलीज होऊ शकत नव्हता. सरकारच्या शंभर टक्के क्षमतेने चित्रपट सुरू करण्याच्या घोषणेने काही निर्मात्यांनी आपल्या चित्रपटांच्या रिलीजच्या घोषणा केल्या आहेत, असं मानलं जातं आहे की,  जवळपास 50 चित्रपट यावेळी रिलीजसाठी तयार आहेत. यशराज फिल्म्सने संदीप और पिंकी फरार', 'बंटी और बबली 2' , 'शमशेरा', 'जयेशभाई जोरदार' सोबतच 'पृथ्वीराज' या घोषणा मागच्या आठवड्यात केली होती.

ईद ला सलमान खानच्या 'राधे' चित्रपटाचे प्रदर्शन निश्चित झाले आहे. अक्षय कुमारच्या 'पृथ्वीराज' चे प्रदर्शन दिवाळीला आणि आमिर खानच्या'लालसिंह चड्डा' प्रदर्शन ख्रिसमासला करण्याचे ठरले आहे. काही चित्रपटांची ऍडव्हान्स बुकिंगदेखील सुरू झाली आहे. चित्रपट मालकांबरोबरच निर्मात्यांचा गमावलेला आत्मविश्वासही परतू लागला होता आणि तामिळ चित्रपट 'मास्टर' द्वारा प्रेक्षकही चित्रपटगृहांकडे परतू लागले होते. कोरोनाचे प्रमाण वाढत असतानाही 11 मार्च ला रिलीज होणाऱ्या जान्हवी कपूरच्या 'रुही' चित्रपटाचे प्रदर्शन स्थगित केलं नाही.

सूर्यवंशी' वर सगळ्यांच्या नजरा

यावेळेला बॉलिवूडच्या निर्मात्यांच्या नजरा ज्या चित्रपटावर खिळल्या आहेत, तो चित्रपट आहे 'सूर्यवंशी'! या चित्रपटाचे निर्माते आहेत करण जौहर, रोहित शेट्टी, अरुण मेहता आणि रिलायन्स एंटरटेनमेंट!रिलायन्स आणि मल्टिप्लेक्स चेन पीव्हीआरवर  यांच्या प्रदर्शनाची जबाबदारी आहे.निर्मात्यांनी याच्या रिलीजची तारीख जाहीर केली आहे.  दुसरा मोठा  चित्रपट 2 एप्रिलला चित्रपटगृहांमध्ये रिलीज केला जाण्याची शक्यता आहे. 

जर चित्रपट निश्चित तारखेला रिलीज झाला तर यामुळे बॉलिवूडच्या दुसऱ्या निर्मात्यांमध्ये उत्साह वाढणार आहे. अशीच परिस्थिती कायम राहिली तर बॉलिवूडला जिवंतपणा येईल.  पंतप्रधान नरेंद्र मोदी यांनी स्वतः लस घेतल्याने लोकांमध्ये सकारात्मक परिणाम दिसून येत आहे महाराष्ट्रात कोरोनाचे रुग्ण वाढत असले तरी देशात अन्य ठिकाणी कोरोनाची प्रकरणे कमी दिसत आहेत. त्यामुळे प्रेक्षक चित्रपटगृहांकडे परतण्याची चिन्हे दिसत आहेत. लोकांमध्ये आता कोरोनाची पहिल्यासारखी भीती राहिलेली नाही. -मच्छिंद्र ऐनापुरे, जत जि. सांगली

सीक्वेलच्या गर्देत सापडला हिंदी सिनेमा

सलमान खानला घेऊन आदित्य चोप्राने 'टायगर 3' ची घोषणा केली आहे. हा 'एक थर टायगर', 'टायगर जिंदा है' या चित्रपटांचा तिसरा भाग आहे. सध्याला बॉलिवूडमध्ये 'दोस्ताना 2', 'बागी 4, 'बंटी और बबली 2', ' क्रिश 4', 'अपने 2, ' गो गोवा गोन 2' सारख्या हिट चित्रपटांचे सीक्वेल बनत आहेत. त्यामुळे बॉलिवूडच्या रथाची चाके जुन्या-पुराण्या रिमेक आणि हिट चित्रपटांच्या सीक्वेलमध्ये अडकली असल्याचे दिसत आहे.

सीक्वेल चित्रपट बनवणे आता सोपा आणि सोयीचा धंदा झाला आहे. कारण एक सीक्वेल चित्रपट कमीत कमी पाचशे कोटींचा व्यवसाय देऊन जात आहे. 'धूम' चित्रपटांच्या श्रुखलेच्या तीन चित्रपटांनी आठशे कोटींचा व्यवसाय मिळवून दिला. 'बाहुबली' च्या दोन चित्रपटांनी दणक्यात रेकॉर्ड ब्रेक अडीच हजार कोटींचा व्यवसाय केला. सलमान खानने पोलिसांची वर्दी घालून दंबगिरी करत तीन चित्रपटांच्या माध्यमातून हजारो कोटी कमावले. बाकीच्या फुटकळ चित्रपटांची कमाई तर सोडूनच द्या. बागी, क्रिश, रेस, हाऊसपुल, गोलमालसारख्या चित्रपटांनी तर 500-500 कोटींच्या वर कमाई केली. कमाई करताना तुम्हाला फक्त त्यातलं टेक्निक माहीत असायला हवं.
सीक्वेल चित्रपट बनवताना तुम्हाला फार काही मेहनत करावी लागत नाही. फक्त एका संत्र्याचा ज्यूस काढा. आणि  तो जो चोथा राहिला आहे, त्यात थोडी साखर आणि बर्फ टाका. त्यात पाणी घालून पुन्हा मिक्सरला लावून घुसळा. झाला ज्यूस तयार. अशा प्रकारे ज्यूस तयार करत राहा. वास्तविक चित्रपट व्यवसाय आता मिठाईच्या धंद्यासारखा झाला आहे. साखरेच्या पाकात गुलाब जामून बुडवून द्या. मिठाईचे दुकान साखरेवरच चालते, तसे बॉलिवूड फक्त सीक्वेलवर चालत आहे. साखरेचा पाक बनवायचा.त्यात गुलाब जामून टाकायचे.गुलाब जामून विकल्यावर उरलेल्या पाकातून जिलेबी बुडवून काढायची.  तरीही साखरेचा पाक उरला तर आणखी एकादा पदार्थ बुडवून काढायचा. सगळी मिठाई साखरेपासूनच बनते, पण सगळ्यांची चव वेगवेगळी राहते. मिठाईवाला 'साखरेच्या नावानं चांगभलं ...: म्हणतो तर सिनेमावले ' सीक्वेलच्या नावाने चांगभलं...' म्हणताहेत.
हा खेळ साधासोपा आहे. धावणाऱ्या घोड्याच्या शेपटीला काहीही बांधले तरी तेही धावायला लागते. हा जुनाच प्रकार आहे आणि हा बोलपटांपासून चालला आहे. 'हंटरवाली’ (1935) चित्रपट हिट झाला होता. तेव्हा वाडिया बंधूंनी 'हंटरवाली की बेटी ' (1943) बनवला. दोन्ही चित्रपट चालले आणि तिथून सीक्वेल चित्रपटांचा व्यवसाय चालू झाला. आज हा व्यवसाय कमाईचा महत्त्वाचा घटक बनला आहे.
यशराज फिल्म्स तर बॉलिवूडचे नाक आहे. या  कंपनीने अलीकडेच ' एक था टायगर', 'टायगर जिंदा है',  बनवले. आता या चित्रपटांचा सीक्वेल ' टायगर 3' बनवण्याची घोषणा केली आहे. आतापर्यंत या दोन 'टायगर' चित्रपटांनी 900 कोटींपेक्षा अधिक व्यवसाय केला आहे. टायगर (सलमान खान) भारतीय रॉ एजंट आहे. तो पाकिस्तानी गुप्तचर एजंट संस्था 'आयएसआय'ची एजंट जोया (कॅटरिना) शी भिडतो.  दोघे प्रेमात पडतात आणि 900 कोटी यशराज फिल्म्सच्या अकाऊंटमध्ये टाकतात. आता 'टायगर 3' या तिसऱ्या चित्रपटात लेखक आदित्य चोप्रा या दोघांना पुन्हा एकदा तिसऱ्या मिशनवर पाठवणार हे नक्की.
यशराज फिल्म्स आणि करण जौहरची धर्मा प्रोडक्शन्स  यासारख्या अनेक कंपन्या आधुनिक सिनेमाच्या फॅक्टऱ्या आहेत, ज्या सिनेमे बनवत नाहीत तर उगवतात. इतक्या चित्रपटांसाठी कथा कोठून आणतात असा प्रश्न तुम्हाला पडला असेल, त्यांच्यासाठी हे सारं सोप्पं आहे. करण जौहर याच्या वडिलांनी 1980 मध्ये 'दोस्ताना' नावाचा चित्रपट बनवला होता. याच नावाने करणने 2008 मध्ये 'दोस्ताना' बनवला. आणि आता त्याच 'दोस्ताना ' नावाच्या चित्रपटाचा सीक्वेल 'दोस्ताना 2' नावाने बनवला जात आहे. त्याच्या वडिलांनी 1990 मध्ये बनवलेल्या 'अग्निपथ'ला 2012 मध्ये त्याने  पुन्हा 'अग्निपथ' नावाने बनवला आणि अडीचशे कोटींचा गल्ला जमवला. करण शेवटी करणार काय?
आजकाल सगळे हेच करत आहेत. त्यामुळे हिंदी सिनेमा एक तर रिमेकवर चालला आहे नाहीतर सीक्वेलवर! या हिंदी सिनेमाच्या रथाचे एक चाक सीक्वेलच्या खड्ड्यात अडकले आहे तर दुसरे रिमेकच्या चिखलात रुतले आहे. यातून बॉलिवूडच्या रथाची चाके बाहेर निघणं कठीण आहे.-मच्छिंद्र ऐनापुरे, जत जि. सांगली 9423368970